jueves, 9 de junio de 2016

14.05.2016 MARCHA SENDERISTA A RUTA D´OS CASTIELLOS


¡¡Hola amigos!! hue pencho una dentrada diferent d´as que he feito dica agora.  Isto va a estar una mena de cronica u de relato d´una marcha senderista.  O fondo ye o mesmo, prou que sí, pero a forma cambea una mica.  Ye atra manera de desfrutar d´o mont, pero con a diferencia que antimás d´os tuyos companyers cutianos, marchas con muita mas chent. Por un regular, son paradas por un club de montanya u de senderismo u a lo menos tienen a colaboración d´istos.

Has de pagar una conduta d´inscripción que gosa estar alto u baixo 20 u 25 euros. Isto incluye desayuno, almuerzo y chenta, amás d´furnidura d´augua y fruita mientres tot o recorriu.  Mesmo te dan una camiseta tecnica u bella coseta mas. Devez tamién gosan meter un autobús, por eixemplo dende Zaragoza, que te leva dica o lugar do s´organiza a marcha.  Asinas que mira-te mocet, por bells 25 euros te desayunas, almuerzas, chentas, camiseta y te ixuplidas de l´auto.  ¿¿Encara dirás que no ye buen pre??  ¡¡Ala no sigas alicate!! ¡¡Au, nomás cal fer-se-ie en caminar!!
Alavez, si un día t´agana d´ir t´o mont con mas chent u con chent diferent, u talment no te vaga parar una cursa, pos companyer, ista ye una  muit buena opción.
Imos con a cronica d´a marcha.  A eslechida ye a Ruta d´os Castiellos, en  a redolada d´a Plana de Uesca.   La organiza a Plana de Uesca de conchunta con Os Andarines d´Aragón.  Sale de Boleya y pasa por Aniés, Castiello de Lobarre, Castiello de Marcuello, Riglos y remata en Moriello de Galligo.  En Moriello, un autobús te leva ta Ayerbe pa fer-te una ducheta y chentar.  En a suya dotzena edición y con bells ueitocientos participants ya ye prou conoixida y consolidada. Conta con tres recorrius:

1. Boleya-Moriello de Galligo, 31,3 km.
2. Bolea Castiello de Lobarre, 11,7 km.
3. Castiello de Lobarre-Moriello de Galligo, 19,6 km.
A isto cal anyader 3 u 4 km. mas si queremos ir t´o mirador d´os vueitres y desfrutar d´as envistas d´os Mallos de Riglos.  Porque hue con toda a chent que bi ha, estoi que no´n veyerás guaires.


Yo he feito con uns amigos a numer tres.  Asinas que nos n´imos t´o Castiello de Lobarre.  Un autobús nos fa puyada dica o Castiello do i hai un puesto de furnidura de birolla.  Con muita chenerosidat nos dan un entropan de magra con tomate, que con aduya d´a bota va de pistón. ¡¡Hahaha!! qué tocins somos, encara no hemos empecipiau y ya nos hemos minchau un chicolate con torta en Boleya y agora un entropan de magra.



Dimpués de pretar-nos o entropan imos arredol      d´as murallas d´o castiello dica plegar en una endrecera cantimplana.  Nos levará por toda a Sierra de Lobarre con una contina envista d´a Plana de Uesca. Cal decir que prou, prou bonica  y mas con o día tan claro que hue tenemos.  Encara que fa buena airera, yo de perén digo que mientres no pleva.....a yo tanto se me´n da.



Cada quatre u cinco kilometros i hai furnidura d´augua y fruitas.  Antimás d´isto, nusatros gosamos portar a bota y femos paradetas pa fer-nos limpios tragos. ¡¡Mai que rico!!!  ¡¡Asinas se fa pacha, prou que si!!
Luego plegamos en a ermita de San Miguel,  do i hai unatra furnidura.  Dende astí aluframos as enrunas d´o Castiello de Marcuello y a suya ermita.




Chusto en iste punto hemos de pillar o esbarre enta o mirador d´os vueitres, si queremos veyer as envistas d´os Mallos de Riglos, u continar a marcha con a resta.  Ir t´o mirador implica fer uns tres u quatre kilometros mas.  Nusatros los femos, ¡¡i hai pitera, prou que si!!  Cal decir que dimpués se facioron prou largos, bufff, hehehe.  Mas que mas honestidat.




Pa yo, a envista que tiens en o mirador ye a mas polida d´os mallos.  Y con as colors que tenemos ista primavera muito millor encara.  Bueno, que a la fin plegaremos os zaguers....  Tornamos t´a ermita y continamos con a marcha.  Luego dentramos en una marradeta muit estreita que fa baixada.  De camín amaneixerán os Mallos de Riglos, me fan a saber-lo de goi, astí, de perén imponents.





Y asinas, con os Mallos de fundo, a escape plegamos en Riglos, un lugar chicorrón pero prou bonico y acullidor.  Aquí tenemos a zaguer furnidura.  Nusatros sí que somos os zaguers... y no ye chanza, hahaha.  Ixo rai, hemos desfrutau d´o maitín y de totz os puestos y lugars y ixo ye o mas important.



Dica Moriello de Galligo bi ha una gambadeta. Femos baixada plegando en o río Galligo, pa dimpués, en un ratet, arribar en Moriello.  Tot isto prou que sí, con os Mallos de Riglos cusirando-nos. Pa rematar, un autobús nos ye asperando pa levar-nos ta Ayerbe, an nos femos una ducha y chentamos totz chuntos.


Bueno companyers, ya sabetz, a l´atro anyo, en mayo, tenetz una buena desincusa pa fer-tos una buena gambadeta en ista repolida redolada que ye a Plana de Uesca.  Tos meto contino un video que he feito con todas as fotos que facié iste día.  Isto ye nuevo en o blog, a veyer qué tos pareix.
Besichons y abrazos !!!