10.09.2016 RUTA D´O FLYSCH ZUMAIA-DEBA

Ista talment siga una sorpresa, pero ye que ibonsycrabas no ye zarrau a fer nomás cursas en as montanyas. Ista vegada fuemos dillá, nos ne fuemos t´o País Basco, Guipuzcua, a mar, a Cantabrica, a ruta d´o Flysch, dende Zumaia dica Deba.  Mar y montanya en o mesmo día.  Una cursa realment sorprendent.  Heba sentiu charrar d´ella y en o mío lugar siempre decibanos que hebanos de fer-la.  Con que un cabo de semana de setiembre pillemos l´auto y t´a Zumaia.  ¿Cómo ir-ie?, a mirar, Zaragoza-Pamplona-Donosti-Zumaia.  No meto os numers d´as carreteras, pero ascuita, dica Donosti autopista u autovía y dende allí mete o GPS y prau.  Con tot y con ixo, mesmo sin GPS no ye guaire embolicau de plegar-ie.  Obviament, no ye una cursa pa ir-ie un día y tornar ta Zaragoza, prou que no.  Si i vas, aprofita y fe-te un finde por allí.  Buena chent, buena birolla, mar y montanya...¡¡qué mas quiers!!
Ye una cursa linial que transcurre por a GR121.  A GR121 ye circular y va arredol d´o País Basco. Aparcaremos en Zumaia y en tornaremos con o eusko-tren.  Iste tren recorre toda a costa basca.  Tienen tot muit bien comunicau, se nota que bi ha diners.

RUTA LINIAL

DISTANCIA:  15 KM.

DESNIVEL:  600 METROS
DIFICULTAT:  BAIXA
HORAS DE MARCHA:  5 HORAS

Puet estar que t´haiga chocau o nombre d´a ruta, Flysch.  Flysch ye una parola provenient de l´alemán.  Significa alto u baixo, eslizar-se, u terreno que esvariza.  Un flysch ye una formación rocosa de orichen sedimentario an que s´alternan capas de roca de diferent duricia.  Por ixo, a erosión no ye a mesma en todas as capas y se cheneran istas formas linials en a roca.  Han pasau mils d´anyos pa que agora nusatros las veigamos asinas de bonicas.  Gracias a o suyo gran interés cheolochico, ista zona estió declarada como Cheoparque d´a Costa Basca.  Tampoco no creigatz que nomás bi ha flysch en a costa, no, no.  O retacule d´a mar durante mils d´anyos fa posible que plegue en puestos de l´interior.  Un eixemplo que de seguras beluns de vusatros conoixetz ye en Sobrepuerto (Uesca), bien luent d´a costa.  Qui conoixca ixa zona puet fer-se alcordanza d´o Puent d´as Crabas, allí bi´n ha.
M´entrefilo que con a clase de cheolochía y as fotos que tos amostro, ya tenetz claro o concepto de flysch.


Alavez, empecipiamos a ruta.  Nusatros aparquemos l´auto en a gara.  D´ista forma de tardes quan tornemos en o eusko tren no cal caminar guaire dica l´auto.  Ixo sí, agora hemos de cruzar tot Zumaia, pero ixo importa igual, no hemos feito que empecipiar y somos con fuerzas.  Pasamos por o puerto y tras fer una chiqueta costera plegamos en a ermita de Sant Telmo.  Isto se puet considerar o punto d´empecipie.  Aquí veyemos os primers sinyals d´a ruta.
  

A ermita ye sobre a placha de Itzurun.  Bonica placha, do a primer hora, as cinglas fan que siga en o paco. Un mes dimpués d´estar-ie nusatros a serie de TV "Chuego de Tronos", eslechió ista placha pa gravar bellas scenas.  O flysch ye vistero dende o empecipie en as paretz d´as cinglas.

O día ye claro y as envistas as millors.  Kilometros de costa, plena de cinglas y a saber-lo d´augua.  A verdat ye que quan lo tiens debant tuya, en toda a suya inmensidat ye prou bonico.  Mesmo como en a montanya, sientes ixa libertat adintro tuya y yes a saber-lo de gran.

Isto puet pareixer una fateza, pero entrefila-te un esvarizaculos chigant y asinas ye toda a cursa.  De  contino t´alto y t´abaixo.  En primeras, imos t´alto a o canto d´a mar, pero de camín imos ta l´interior.  Bi ha grans praus y bestiar suelto.  Y se nota que aquí tamién ha estau un verano ixuto, a color no ye tant verde como habría d´estar.  Pasamos tamién por bells campos d´uga, pa fer o txakolí, un vin blanc muit rico tipico d´aquí.  ¡¡Has de tastar-lo chiquet!!  En hora y meya plegamos en un aria de descanso, bien se vale que con buena uembra, que hue fote bien o sol.  Ye o puesto perfecto pa almorzar, prou bien apanyau mesmo pa fer nueit con l´auto.  Bi ha excusaus y un bar chiquet.

Chusto a o canto de l´aria de descanso, bi ha un camín t´a man dreita que en cinco menutos plega en un mirador.  O mirador de Baratzazarrak.  Dende a salida no hebanos visto a mar y ya en tenebanos ganas. Femos una golladeta enta Zumaia, bonico, me fa goi.  Tornamos y continamos a marcha mas enta l´interior. Luego o camín fa puyada por una selva de pins.  ¿Ye rarizo no?, pins a o canto d´a mar y amás con ista humedat, pos sí, sí, pins.  Mira-te si ye maho isto.  Y continamos con o "puya-baixa", buff, empecipiamos a estar una mica cansos, hehehe.

Pasau un ratet plegamos en a parte mas altera d´a primera metat d´a cursa.  A monico descendemos dica o nivel d´a mar.  ¿Una mallata en a Cantabrica?  haha, por totz ye conoixiu que aquí tamién tienen buen bestiar.  De pernils y ternasco, puet estar que no guaires, pero de vacas un fascal.

Mas enta debant plegamos en atro mirador, an que ye a cuerda Portutxiki. No podemos ir-nos-ne sin fer a craba y prou que sí, baixamos por a cuerda. A marea comencipia a baixar y podemos veyer millor os flysch. No tos he dito dica agora, pero pa fer ista ruta, y poder veyer millor os flysch, cal mirar-se os horarios d´as mareas y programar a marcha seguntes as mesmas. Nusatros no lo faciemos, encara que lo sabebanos.  Tos lo reconto porque ista cuerda realment ye mesa pa puyar.  Porque quan a marea ye baixa puetz fer un recorriu a o nivel d´a mar.  Cal baixar una mica antes y a la fin acabar puyando en iste punto.  Atra opción mas que interesant.  Si hesenos puesto, l´hesenos feito.  Dende aquí, seguntes a mía opinión, tenemos as millors envistas y ye a parte mas bonica d´a cursa.  Ixo sí, tamién comencipia a parte mas dura.  Agora as costeras son continas, enta alto y enta baixo.  

Enta Zumaia

Bonica placha

As mesmas envistas, pero mas alto

¡¡Qué costerons quias!! ¡¡Agora, agora!!  si no hebas parau cuenta a cursa tien 600 metros de desnivel.  No lo creyes porque vas chunto a la mar, pero se fa duro. Son costeras curtas, pero continas y duras.  Atra vegada baixamos quasi dica o nivel d´a mar y o camín aprofita una antiga linia de ferrocarril.  Pasa mesmo por os tunels, ye curioso y muit vistero.  Pensemos que ya yeranos en Deba, quan de bote y boleyo, una sinyal diz que encara faltan 5 u 6 kilometros.  Y prou que en faltaba, hahaha, y as piors costeras tamién, prou que sí.  Encara pasemos por una depuradora, an que diz, ¡¡ya ye, a la fin!!  y piensas.... depuradora-lugar-personas... ya i somos.  Pues no, para firme cuenta, yo nunca no he visto una depuradora mas luent d´un lugar que ista.  Cal puyar atro mont dica a ermita de Santa Catalina.  Y ista sí que ye o zaguer y astí alto a la fin ya s´alufra Deba.  Nomás fer a baixadeta y ya i yes.

Qué mas recontar, que i pleguemos escruixinaus y con una fambre y una seteguera a saber-lo de gran. Como hetz visto o día salió espectacular.  Nos faciemos una buena chenta y nos metiemos bien capins.  Pero zorros, zorros, hahaha, prou que sí, que dimpués en tornemos en tren.  Bebiemos bien de sidra y de postre un buen copazo.  De tardes con a zorrera t´a placha.  Una sinyora placha y no as d´a Mediterranea. A saber qué gran y con buenas ondas.  Asinas que buenas pintacodas y buenas tripadas.  Como os ninos i estiemos.  

Bueno que podetz ir-ie y encara que pareix que no, a la fin se fa una mica dura.  Pero ye prou maha.  Lo pasemos chenial os quatre que i estiemos.

¡¡Besetz pa totz!!  ¡¡Que vaiga bueno!!

01.09.2016 CASTIELLO MAYOR (2.018 M.)

¡¡Ola amigos!! fa muito tiempo que no escribiba.  Fa dos meses u mas dende a zaguer dentrada d´a Penya Montanyesa.  No sé si ye l´hibierno u qué ha puesto estar.  Antimás mira-te que me fa a saber-lo de goi, manimenos ye como si hese afogau as mías ganas de escribir.  De seguras que m´hetz trobau a faltar, ¡¡hahaha!!  Estoi que..... mmmmm, no sé, no sé...  Lo important ye que ya he tornau y contino con a mesma ilusión que quan comencipié y mas que mas seguindo con o mío refirme a l´aragonés  Honestament, ha estau por a falta de tiempo.  Poquet a poquet soi tornando a fer corridas atra vegada y os "entrenos" sacan muito tiempo.  Y entre treballar y correr, quan plego en casa, a verdat, no m´agana de escribir.  Tiengo bellas cursas mas amás d´ista, prou variadas, a o costau d´a mar, de lugars albandonaus, entibos, una mica de tot.  Pero a primer cursa va a estar o Castiello Mayor, feita l´un de setiembre, un día dimpués de fer a Penya Montanyesa.  No yera previsto, pero dende a tuca d´a Penya Montanyesa lo viyé, me fació goi y decidié de fer-lo.  Ye una ascensión prou facil y curta y as envistas que ofreix son prou bonicas.  Ixo si no tiens guaires boiras como yo ixe dia, porque quasi no veyeba nian a Penya Montanyesa y ixo que ye un mont que se deixa de veyer.

  

RUTA QUASI CIRCULAR

DISTANCIA 7 KM.

DESNIVEL:  750 METROS

DIFICULTAT:  BAIXA

HORAS DE MARCHA:  4 HORAS

Dende A Insa, dirección Bielsa, pillamos o esbarre de Escalona t´a Puertolas.  Y pasau iste chiquet lugar, t´a ezquierda por a carretera de Bestué.  Poco dimpués, cal pillar una pista t´a dreita t´a Montanya de Sensa y pasau un kilometro de pista bi ha un aparcamiento chicorrón y astí empecipia l´ascensión. Aspero que ista foto sirva pa orienta-tos. Ye poliu l´auto ¿eh?  ¡¡Para cuenta que se veye pero no se toca quia!!

Dezaga de l´auto bi ha una marradeta que fa puyada entre osbuixos.  Poquet a poquet y seguntes imos ascendendo o camín se torna rocoso.  Pa yo ista parte ye a mas dura d´a cursa.  Bi ha zig-zag de contino y vas prenendo altaria bien aprisa.  A la fin plegamos en os Plans d´o Castiello Mayor.  Un prau chigant en o bell centro d´as murallas d´o castiello. 

En os Plans, hemos feito a primer parte d´a puyada.  Ye un buen puesto pa prener fuerzas.  Estoi que ya sabes por qué iste mont se clama Castiello Mayor.  Bien, si te miras a primer foto de todas, allora si fa u no fa, a zona d´o centro de color verde son os Plans.  Agora iremos t´a dreita, cal travesar tot o prau dica la fin por un camín cantimplano.  Trobo una manada de sarrios que a escape se perde entre a boira preta. Siempre s´amagan quan veyen a os humans y fan bien, que somos lo pior. Tot lo que tocamos lo estricallamos.

Mira-te istas dos fotos.  En a primera soi en o canto este d´o Castiello Mayor y foi una golladeta enta dezaga pa que veigatz os Plans.  En a segunda enta alto pa que veigatz tamién lo que encara queda.  Imos a fer toda a crencha d´o Castiello dica plegar en a tuca.  Camina a monico, imos sobre unas rocas grans y bi ha unas crepas prou ubiertas an que puetz ficar un piet y fer-te mal.

Seguimos por a crencha, en o fundo ya s´alufra o vertice cheodesico.  As envistas, encara que a boira preta priva de veyer-ie guaire(ahiere pasó lo mesmo en a Penya Montanyesa), son espectaculars. Ixo sí, no veigo as Tres Serols, ni os monts d´o suyo arredol. Pero veigo os lugars de Escuaín y Revilla, a foz d´Escuaín, o circo de Gurrundué, alto u baixo veigo as Sestrals y Penya Canciás y a Penya Montanyesa prou que sí, que ya fa un ratet que se i veye. ¡¡Qué mas te fa falta pa venir-te-ne?? 

Contino, as envistas dende a tuca.  Han estau 2 horas y meya y un desnivel de bells 700 metros.  Una gambadeta pa tú, ¡¡que yes un crack!!

Por astí somos puyaus, con a Penya Montanyesa cusirando-nos

As murallas d´o Castiello Mayor

Dende alto, os Plans d´o Castiello Mayor

A tornada la facié baixando dreito travesando os Plans por o bell medio.  Atra opción ye continar fendo a crencha y rodiar toda a muralla.  Dimpués pillaremos a mesma marradeta que hemos puyau iste maitín dica plegar en l´auto.  Pero lo millor d´o día encara no heba plegau.  Dimpués, me´n fue t´a Escuaín con a ideya de fe-ie nueit, y de feito la i facié.  Tampoco no perdié a oportunidat de fer-me un banyo en as badinas que fa o río Yaga.  Un puesto natural, afortunadament no guaire conoixiu con bellas badinas.  La mas gran, con mas de dos metros de profundidat, ye baixo una bonica coda d´augua.  L´augua ye a saber que freda pero cal capuzar-se-ie sí o sí, ¡¡cal remullar-se!!  Y lo facié, prou que sí, a guía se me metió como una faba, mai mía que freda, ¡¡hahaha!!

Tamién tos digo, que bi ha meya hora baixando dende l´aparcamiento.  Para firme cuenta que dimpués pa fer a puyada, perdes a escape a fresquera de l´augua.

Pa acabar, bellas impresions de Escuaín.  Un lugar bonico como totz os chicorrons lugars pirinencos. Dentre as casas espaldadas bi ha una bonica plaza en a dentrada, un estudiet de turismo y bellas casas apanyadas. En o estudiet me dicen que de verano son habitadas.  Pero antimás,tamién bi ha atros habitants en iste lugar. Os gatos, no desachero quan digo que ye infestau de gatos.  En todas as carreras, finestras, puertas, arbols, en totz os puestos bi ha un gato.  Quan caminas por o lugar, mesmo sientes que te vichilan. A lo menos yo, ixo sentié.  Mesmo me fació miedo de nueitz, y ye que salié de l´auto a pichar y no i veyeba que uellos de gato brilar en a foscor. ¡¡Hahaha!! Creye-me que me fiqué en l´auto y dica que no briló o sol no torné a salir.

Escuaín a os pietz d´o Castiello Mayor

En os arredols de Escuaín bi ha sinyalizada una ruta por bells miradors con envistas t´a Foz d´Escuaín. En a foto d´a dreita, allí en o fundo son as badinas d´ahiere.  

Con isto ya acabo chiquetz, y ye que devantar-se y trobar-se con isto...no tien pre.  Ista foto la facié desayunando-me.  Y tamién mira-te, que agora que ya me´n voi se´n va a boira preta, gosa pasar.  A verdat, encara que ista val perteneix a o Parque Nacional d´Ordesa, no ye guaire visitau y ye bonico igualment. Estoi que o millor ye ixo, que no se´n viene tanta chent y por ixo m´ha feito tanto goi de visitar-lo.  Y aspero que asinas siga estando.  Si os demandan información d´iste puesto, decitz-les que ye muit fiero, decitz-les-ne.  Que no i vaigan, y asinas continará estando nuestro, nomás pa nusatros...

31.08.2016 PENYA MONTANYESA (2.292 M.) DENDE SANT VETURIÁN

¡Ola chiquetz, unatra!  Ent´o norte de A Insa, cusirando o Sobrarbe, bien esclatera y con ixa figura tant caracteristica, surte a Penya Montanyesa.  Vistera quasi dende cualsiquier puesto d´o Sobrarbe ye una roca gran de 2.292 metros y a mas conoixida d´a redolada.  Feba tiempo, feba anyos que m´aganaba de fer-la y en bells días que teneba, pillé a furgo y t´o Sobrarbe.  Un chicot viache de tres días, pa fer a Penya Montanyesa y o Castiello Mayor, amás de visitar, Bielsa, a Val de Chistau, A Insa y Boltanya. Tot isto fendo nueit en Chanovas y Escuaín.  La facié por a suya cara sud, dende o Monesterio de Sant Veturián.  Mas concretament dende l´aparcamiento que bi ha bells 500 metros antes d´o monesterio.  Cal pasar A Insa, y por a N-260 dirección Campo, en bells 10 km., pillar o esbarre de Arro.  Dende aquí, por una estreita carretera comarcal y pasau o lugar de Oncins,  i plegaremos.

RUTA LINEAL

DISTANCIA:  12 KM.

DESNIVEL:  1.250 METROS

DIFICULTAT:  MEYA

HORAS DE MARCHA:  5-5,5 H.

No ye un mont guaire recomendable de fer en agosto porque quasi tot o camín vas por o solano.  Mas que mas a tornada.  Como en ibons y crabas imos sobraus de pitera, lo faciemos o zaguer cabo de semana 
d´agosto. De feito, nomás me i trobé con una parella de navarros en a tuca.  De Santesteban yeran, y bien mahos.  Facié buena charrada con ells mientres baixabanos.  

O punto de empecipie ye bien sinyalau en un canto d´a carretera.  En primeras, como se veye en a primer foto, cal travesar un chiquet bosque. Ye un camín cantimplano entre buixos, caixicos y bells pins.  A escape se torna costerudo y terne que terne iremos enta alto que hue bi ha un buen desnivel.

En un ratet salimos d´o bosque y continamos a dura costera por a mesma marradeta plena de zaborros y erizons. ¡¡A mirar!! t´a ezquierda seguindo ixe signal royo se´n va por a faixa d´o toro. Ye una faixa que va a meya altaria d´a Penya Montanyesa.  Yo voi tot dreito por a ruta cutiana.  A venient vegada iré por astí, estoi que ye una ruta mas bonica.  Ixo sí, seguntes he sentiu no ye tant bien sinyalizada, encara que tampoco no suposa garra problema.

Rematamos iste tramo d´os erizons en ista paret.  Cal esbarrar-se una mica ent´a ezquierda y dimpués d´una chiqueta y facil trepada somos en Os Plans.  Pa orientar-te, mira-te a primer foto, agora yes do remata a línia roya.

En Os Plans a la fin aluframos a tuca.  Con tot y con ixo, para firme cuenta que encara ye prou luent. Empecipió a meter-se a boira preta, asinas que he de mezclar as fotos d´o maitín con boira preta y d´a tarde con sol pa poder explicar-tos bien a cursa.

Y agora cal explicar o venient esbarre porque bi ha una gran diferencia entre pillar una dirección u atra. Mas que mas por a dificultat.  A la fin d´Os Plans, plegas en un punto an que bi ha bells sinyals ent´a dreita  y atros pa continar dreito.  Puet estar que los veigas os dos u un nomás.  Tos reconto, si continas dreito... ¡¡ye o tuyo día de suerte!!, porque ye a opción mas facil.  Iste camín fa baixada una mica y dimpués fa puyada rodiando a tuca por o suyo costau ezquierdo.  Ye un recorriu mas largo pero con prou menos dificultat.  Pero...¡¡a mirar!! ya t´entrefilas por dó fue yo.  ¡¡Hahaha!! pos ixo t´a dreita.  D´ista forma, o camín fa puyada rodiando l´agulla d´o bell medio d´a foto dica ixos chiquetz arbols.   Dende astí, por unas gleras con prou desnivel y parando firme cuenta de no esbarizar-te, plegas en a tuca.

Qué pena que se metió a boira preta, as envistas dende a tuca hesen estau a saber qué bonicas.  Y mas pena da, quan empecipias o descenso y de momento desapareixen as boiras.  ¡¡Mecagüen a hostia negra!! Gosa pasar, de seguras que no será a zaguer vegada.  Ye maho o catatico iste que han meso en a tuca.  Tien un chiquet caixón y adintro unas fuellas pa escribir bella cosa.

En o centro o Castiello Mayor, será a venient dentrada en o blog

Baixo a boira preta, os entibos de Mediano y o Grau

Dende Os Plans

Lo mesmo dende ista chiqueta estación metereolochica

En a tuca bi heba una parella de navarricos.  I estiemos un ratet y chino-chano baixamos totz chuntos.  Pillemos buen capazo.  Les dicié que charraba aragonés, que teneba un blog y les reconté alto u baixo a problematica que tienen os charradors u en o mío caso os que prebamos de fer-lo.  Quedoron enarcaus por a falta d´intrés y a indiferencia que por un regular amostra a chent.  
Pa rematar o día me´n fue ta Chanovas.  Tamién yera un lugar que dende fa tiempo quereba visitar.  Unatro eixemplo d´as expropiacions que sufrioron muitismos lugars en os Pirineus.  En iste caso, con a particularidat que a la fin no se i constuyó garra entibo.  A día de hue, fa vergüenya  saber que as tierras no han retornau a os suyos propietarios.  Ni tienen garra intención de fer-lo, a no estar que agora paguen un fascal de diners.  A tamás mías, isto tendría una solución mas chusta.  Trobo a faltar una mica de humanidat.

Bueno chiquetz, estoi que ha estau una dentrada prou completa.  Una mica de tot.  Un mont con muita personalidat como ye a Penya Montanyesa y un breu resumen d´a historia de Chanovas y a tristura que fa.  

Y no tos lo perdatz que pa rematar facié nueit en Chanovas, en a ribera d´o río Ara.  Con o rudio de fundo d´as suyas auguas.  Ixo no tien pres, prebatz de fer-lo.

¡¡Que plantetz fuerte amigos!!  ¡¡Besetz!!